ورلڈ گولڈ کونسل کے مطابق، دنیا بھر کے مرکزی بینکوں نے جون میں مسلسل تیسرے مہینے خالص بنیادوں پر سونے کی خریداری میں اضافہ کیا، جس کے نتیجے میں مجموعی ذخائر میں 51 ٹن کا اضافہ ہوا، جبکہ ایک ماہ قبل یہ اضافہ 41 ٹن تھا۔

پولینڈ کے مرکزی بینک نے سب سے زیادہ 19 ٹن سونا خریدا، جبکہ اس کے بعد چین کے عوامی بینک (پیپل بنک آف چائنہ) نے 15 ٹن سونا خریدا، جو اس کی مسلسل 20ویں ماہانہ خریداری تھی۔

دیگر نمایاں خریداروں میں ازبکستان (9 ٹن)، قازقستان (7 ٹن)، اردن، جارجیا اور گھانا کے مرکزی بینک شامل تھے۔

سال کی پہلی ششماہی کے دوران دنیا بھر کے مرکزی بینکوں کی مجموعی خالص خریداری 102 ٹن رہی۔

اس عرصے میں پولینڈ نے سب سے زیادہ 82 ٹن سونا اپنے ذخائر میں شامل کیا، اس کے بعد ازبکستان (41 ٹن)، چین (40 ٹن) اور قازقستان (27 ٹن) کا نمبر رہا۔

دوسری جانب، روس اور ترکی جون میں سونے کے سب سے بڑے فروخت کنندہ رہے، جنہوں نے بالترتیب 9 ٹن اور 2 ٹن سونا فروخت کیا۔

پوری پہلی ششماہی کے دوران روس نے اپنے سونے کے ذخائر میں 44 ٹن کی کمی کی، جبکہ ترکی دنیا کا سب سے بڑا فروخت کنندہ بن کر سامنے آیا، جس نے مجموعی طور پر 83 ٹن سونا فروخت کیا، جس کا زیادہ تر حصہ پہلی سہ ماہی میں فروخت کیا گیا۔

ترک مرکزی بینک کی بڑے پیمانے پر سونے کی فروخت، تقریباً 55 ارب ڈالر کی کرنسی مداخلتوں کے ساتھ، زرمبادلہ کی لیکویڈیٹی بڑھانے اور ترک لیرا کو سہارا دینے کے لیے کی گئی۔

مرکزی بینک کے گورنر فاتح کراہان نے ان اقدامات کو بیرونی معاشی جھٹکوں سے معیشت کو محفوظ رکھنے کے لیے ایک فطری اور ضروری پالیسی ٹول قرار دیا۔